गाउँलेको स्वागत सत्कारबाट विदेशी पाहुना खुशी

रामकृष्ण चापागाईं, १६ भदौ (काभ्रे)

पहिलो पटक नेपाल आएकी जापानीज विद्यार्थी तेराओ नानाको धेरै खुशी भइन् ।

स्थानीय गाउँलेहरूका साथै ग्रामीण क्षेत्रका विद्यार्थीहरूको न्यानो माया पाएपछि उनले भनिन्- "सहरका भन्दा गाउँका मानिस धेरै मायालु हुँदारहेछन् ।" मङ्गलबार गाउँमा भव्य स्वागत सत्कार पाएपछि दङ्ग परेका अर्का विद्यार्थी योसिताका इमोन प्रतिक्रिया दिँदै थिए- यहाँका मानिस धेरै मिजासिला रहेछन् ।" जापानमा वातावरणसम्बन्धी पनि अध्ययन गरिरहेका इमोनलाई यहाँको स्वच्छ वातावरणले अझ लोभ्याइरहेको थियो ।

पर्यटन वर्ष २०११ लाई लक्षित गरी पातलेखेतमा सन्चालन गरिएको होम स्टे कार्यक्रममा भाग लिन तेराओ र योसितासँगै मङ्गलबार आएका अन्य १६ जना जापानीज विद्यार्थीहरू गाउँमै उत्पादित तथा तयार पारेको ताजा खानेकुरा खाएर नेपाल भ्रमणको अझ आनन्द लिदै थिए । हाम्रो गाउँमा पर्यटकहरूलाई भित्राउन नगरकोटको भन्दा बढी सम्भावना छ होम स्टे कार्यक्रमका संयोजक केशव बडालले भने- "यहाबाट नजिकै ऐतिहासिक पलान्चोक भगवतीको मन्दिर छ साथै नमोवुद्ध जान पनि यहाबाट नजिक पर्छ ।" काभ्रे भन्जाङदेखि नै स्वागत सत्कार गरी ल्याइएका जापानीज विद्यार्थीहरू यहाँबाट देखिने ग्रामीण क्षेत्रका सुन्दर दृश्य आफ्नो क्यामरामा कैद गर्दै भन्दै थिए- "कति सुन्दर रहेछ नेपाल ।"

विदेशी पाहुना राख्न पातलेखेतको डाँडागाउँमा हाल १६ वटा घर तयार गरिएको छ । भइरहेको घरलाई सजाउन ५ हजार रुपैयाँसम्म लागेको उनीहरू बताउँछन् । ३ दिनसम्म बस्ने योजनामा जापानबाट आएका विद्यार्थीहरूलाई स्थानीय उत्पादन मात्रै खुवाइने छ । खानबस्ने गरी एकजनाको प्रतिदिन १ हजार रुपैयाँ खर्च लाग्नेछ कार्यक्रम संयोजक बडालले भने ।

यहाँ आउँदाको अनुभव सुनाउँदै एक जापानीज विद्यार्थी भन्दै थिए- "साच्चै नेपाल भ्रमणको अनुभव अविस्मरणीय हुने भो ।" "सहरको होटल रिसोर्टमा बसेर भन्दा गाउँमै बसेर नेपाल घुम्नुको मज्जा छुट्टै आउदो रहेछ-" ति विद्यार्थी भन्दै थिए । गाउँलेको न्यानो पायाँ पाएकी अर्की विद्यार्थी काओरी मात्वुई निकै रमाइरहेकी थिइन् ।

यो कार्यक्रम प्रभावकारी रुपमा सन्चानल गर्न सकिए धेरै पर्यटक भित्रयाउन सकिन्छ कार्यक्रम संयोजक बडालको भनाई थियो- "स्वच्छ वातावरणसँगै यहाबाट देखिने गाउँका सुन्दर दृश्यहरू पर्यटकलाई साच्चिकै लोभ्याउने छ । विदेशी पाहुनाहरूले नेपालीहरूको दैनिकी नजिकबाट हेर्न पाउने हुँदा पनि उनीहरूलाई नेपाल भ्रमणको स्मरण सधै भइरहने र अन्य पर्यटकहरूलाई समेत नेपाल आउन प्रोत्साहित गर्ने बडालको धारणा छ ।

पर्यटकलाई बाजागाजासहित गाउँलेहरुको भव्य स्वागत, खानामा स्थानीय उत्पादन, ग्रामीण घरमा बर्साई, स्वच्छ वातावरण, हिमाल पहाड तराई एकै ठाउँमा भएजस्तो भौगोलिक बनावट अनि थुप्रै पर्यटकीय गन्तव्य स्थल, सिङ्गो नेपालकै प्रतिनिधित्व गर्ने काभ्रेमा सुरु गरिएको होम स्टे कार्यक्रमले पर्यटन वर्ष २०११ सफल बनाउन महत्वपूर्ण भूमिका खेल्नेछ स्थानीय पत्रकार ईश्वरी ओझाले भने ।