भोटेकोशीमा बस खस्यो, १५ जना बेपत्ता

सिन्धुपाल्चोक, २१ भदौ
सिन्धुपाल्चोकको गाती गाविसनजिकैको ढुंगाखानीबाट भोटेकोशीमा आज बिहान एक यात्रुवाहक बस खस्दा कम्तिमा १५ जना बेपत्ता भएका छन्। चालक, सहचालक र एक यात्रु नदीमा पौडेर बच्न सफल भएका छन्। बाँकी १५ जना बेपत्ता भएको प्रहरीले पुष्टि गरेको घटनास्थलमा रहेका नागरिकन्युजकर्मी ध्रुव दंगालले जनाएका छन्।

तातोपानीबाट बाह्रबिसे आउँदै गरेको ना २ ख ४०१३ नम्बरको यात्रु बस सिन्धुपाल्चोकको गाती गाविस ९ ढुंगाखानी भन्ने ठाउँबाट सय मिटर तल भोटेकोशीमा खसेको हो।



घटनास्थल काठमाडौँबाट १०५ किलोमिटरको दूरीमा पर्छ। अहिले घटनास्थलमा प्रहरी र स्थानीय बासिन्दाहरुले उद्धार गरिरहेका छन्।



यसअघि बसमा ३० यात्रु रहेको भनिए पनि बसमा चालकसहित १८ जना यात्रु रहेको र १५ जना बेपत्ता रहेको प्रहरीले पुष्टि गरेको छ। --- NAGARIKNEWS.COM