नेका जिल्ला सभापतिद्वारा पत्रकारलाई धम्की

सिन्धुपाल्चोक ,  भदौ १५
सानुसिरुबारी गाविस-६ घर भई नेपाल पत्रकार महासंघ जिल्ला शाखाका सह-सचिव एवं नागरिक राष्ट्रिय दैनिकका जिल्ला संवाददाता धु्रव दंगाललाई ०६७ भदौ १४ गते नेपाली कांग्रेसका जिल्ला सभापति मोहनबहादुर बस्नेतले आफ्नो पक्षमा समाचार नलेखेको आरोपमा मार्ने धम्की दिएका छन् ।



पत्रकार दंगालका अनुसार बस्नेतले नामै किटेर गालीगलौज गर्दै ९८५१०२५९१७ नम्बरको मोवाइलबाट अश्लील शब्द प्रयोग गर्दै जिल्लाका पत्रकारहरूले आफ्नो पक्षमा समाचार नलेखेकोले सबैलाई केही दिनभित्रै ठीक पार्ने चेतावनी दिए । उनको भनाइ अनुसार- "कुनै हालतमा पनि मलाई असहयोग गर्नेलाई छाड्दिन" भनी सभापति मोहन बस्नेतले भनेका छन् ।'



घटनापछि नेपाल पत्रकार महासंघ जिल्ला शाखा, प्रेस चौतारी नेपाल सिन्धुपाल्चोक र नेपाल प्रेस युनियन जिल्ला शाखाले ०६७ भदौ १५ गते छुट्टाछुट्टै प्रेस विज्ञप्ति जारी गरी घटनाको विरोध गरे । विज्ञप्तिमा नेपाली काँग्रेस जिल्ला सभापतिद्वारा जिल्लाका सबै पत्रकारहरू असुरक्षित भएको र कुनै पत्रकारमाथि केही भएमा त्यसको जिम्मेवार सभापति बस्नेत हुनुपर्ने भनिएको छ ।



त्यसैगरी नेका जिल्ला सभापति मोहनबहादुर बस्नेतले पत्रकारहरूलाई दिएको धम्की फिर्ता लिदै सार्वजनिक माफी नमागे उनी संलग्न कार्यक्रमहरू जिल्लाका सम्पूर्ण पत्रकारहरूले बहिस्कार गर्ने समेत प्रेस विज्ञप्तिमा उल्लेख छ । - onseconline.org